ایک اور زبردست خوبی ان کا کردار ہے۔اس دور میں بہت سے مسلمان رہنما تھے۔ کئی عالم دین بھی تھے مگر قائد اعظم مسلمانوں کے واحد رہنما بن کے ابھرے۔ اس کی  ایک وجہ توان کا وکیل ہونا تھا کہ وہ  کسی بھی دوسرے سے بہتر پاکستان کا مقدمہ لڑ سکتے تھے اور دوسری وجہ  ان کا  بے داغ کردار تھا کہ  جس کی بنا  پر مسلمانوں کو یہ یقین تھا کہ یہ بندہ نہ جھک سکتا ہے اور نہ بک سکتا ہے۔اور انھوں نے اپنی تمام عمر اس کردار کو ثابت کر کے دکھایا۔آپ ان کا کمال دیکھیں کہ ان کی اردو اتنی اچھی نہیں تھی اور وہ زیادہ تر تقاریر انگریزی میں کرتے تھے جو عام مسلمانوں کے لئے آج کل بھی جاننا مشکل ہے کجا کہ پون صدی قبل۔ لوگوں کو یہ معلوم نہیں ہوتا تھا کہ وہ کیا کہہ رہے ہیں مگر یہ خوب جانتے تھے کہ وہ جو کہہ رہے ہیں ہمارے حق میں کہہ رہے ہیں۔
ان کے کردار کو آپ ان کی زندگی کے آخری سالوں میں دیکھیں کہ جب ان کی بیٹی نے ایک پارسی سے شادی کرنا چاہی تو انھوں نے اس کو منع کیا  مگر جب وہ اپنی ضد سے باز نہ آئی تو انھوں نے اسے عاق کر دیا ۔ ایک شخص کہ جس کی ایک ہی بیٹی ہو اور وہ ملی بھی اسے اپنی زندگی کی پچاس سے زائد بہاریں دیکھنے کے بعد ہو ،  اس کے لئے یہ کوئی آ سان فیصلہ نہ تھا  تاہم انھوں نے اپنی محبت  کو قربان کر کے اپنے دین سے اپنی اپنی وابستگی کو ترجیح دی اور اپنے کردار کو زندہ رکھا۔
قائد اعظم محمد علی جناح  کی تمام جدوجہد آئین کے دائرے میں تھی۔ انھوں نے کبھی قانون شکنی نہیں کی۔ان کے ہم عصروں نے جیل کی زیارت کی  مگر ہمارے قائد اس سے محفوظ رہے اور انھوں نے ثابت کیا کہ عوام کی خدمت کے لئے جیل جانا ضروری نہیں ہے اور باہر رہ کر بھی ان کی خدمت کی جا سکتی ہے۔
ان میں منافقت نہیں تھی۔وہ جیسے تھے  سب کے سامنے ویسے ہی آتے تھے۔ وہ انگریزی لباس پہنتے تھے اور انگریزی بولتے تھے۔ وہ  زبردستی لوگوں کی نظر میں اچھا بننے کے لئے شلوار قمیص پہنتے اور نہ اردو   بولتے تھے اور نہ ہی مسلم   علماء و مشائخ سے ملاقات کے وقت وہ سر پر ٹوپی رکھتے تھے۔

ہماری بدقسمتی  ملاحظہ ہو کہ ہم نے اپنے محسن کو بھی  اپنی فرقہ بندی کی بھینٹ چڑھا کر شیعہ بنا دیا۔گو کہ انھوں نے یہ ملک کسی ایک فرقے کے لئے نہیں بنایا تھا کہ ان کی نظر میں مسلمانوں کے لئے تھا یہ ملک۔ اگر وہ شیعہ تھے تو بھی ان کی قدر و منزلت میں کوئی کمی نہیں واقع ہوتی بلکہ ہم تو دعا گو ہیں کہ ہمارےتمام شیعہ بھائی قائدِ اعظم جیسے  ہوں۔
قائد اعظم  ایک دھان پان سی شخصیت تھے۔ قد لمبا اور جسم دبلا پتلا۔  آخری سالوں میں وہ ٹی بی کا بھی شکار ہو گئے تھے۔ قائد اعظم نے حصو لِ پاکستان سےایک بات ثابت کی کہ   جسمانی کمزوریاں مقصد کے حصول میں رکاوٹ نہیں بنتیں۔ اگر نیک نیتی سے جدوجہد کی جائے تو کامیابی مقدر ضرور بنتی ہے۔
قائد اعظم  کا ایک عظیم  اور شاید سب سے بڑا کارنامہ پاکستان کے حصول کے لئے پاک و ہند کے مسلمانوں کو اکٹھا کرنا تھا۔پاکستان کے حق میں ان مسلمانوں نے بھی ووٹ دیئے کہ جن کے علاقے پاکستان میں شامل ہونے ہی نہیں تھے۔ اب پورا پاکستان تو کیا کوئی پورا  ضلع ہی کسی ایک مقصد کے لئے اکٹھا کر کے دکھا ئے۔ہم ہر رہنما مقامی  سیاستدان کو لیڈر یا رہنما  مان لیتے ہیں  تاہم یہ ہماری کوتاہ  بینی ہے۔ ہر شخص جو چند ہزار بندے جمع کر لے رہبر نہیں بن جاتا۔ رہبر قائد اعظم جیسا ہوتا ہے جو  اپنے مقصد سے اس قدر مخلص ہوتاہے کہ اس کا اخلاص دیکھ کر مخالفوں کو بھی اس کا ساتھ دینا پڑتا ہے۔‎